યુક્રેનમાં યુદ્ધ દરમિયાન, હોસ્પિટલોમાં ઓક્સિજન પુરવઠાની તીવ્ર અછત સર્જાઈ છે. વર્લ્ડ હેલ્થ ઓર્ગેનાઈઝેશન (ડબ્લ્યુએચઓ) એ ચેતવણી આપી છે કે જો કિવ સહિત અન્ય શહેરોની હોસ્પિટલોમાં તરત જ ઓક્સિજનનો પુરવઠો નહીં પહોંચાડવામાં આવે તો પરિસ્થિતિ ખૂબ જ ખતરનાક બની શકે છે. ડબ્લ્યુએચઓ અનુસાર, યુક્રેનમાં 600 હોસ્પિટલો છે. ત્યાં હજુ પણ કોરોનાના 1700 દર્દીઓ દાખલ છે.
WHO એ પોતાના નિવેદનમાં એમ પણ કહ્યું કે યુક્રેનમાં કોરોના દર્દીઓ સિવાય નવજાત શિશુઓ, ગર્ભવતી મહિલાઓ અને વૃદ્ધોને પણ સમયાંતરે ઓક્સિજનની જરૂર પડી શકે છે. યુદ્ધના માહોલ વચ્ચે લોકોના મિજાજ પર અસરને કારણે સ્થિતિ પણ ચિંતાજનક બની છે.
વિષમ પરિસ્થિતિને કારણે ત્યાંની તમામ હોસ્પિટલોમાં ઓક્સિજન લગભગ ખતમ થઈ ગયો છે. ઓક્સિજન જનરેટર પ્લાન્ટમાંથી હોસ્પિટલ સુધી ઓક્સિજન પહોંચાડવામાં ટ્રકોને પણ ઘણી સમસ્યાનો સામનો કરવો પડી રહ્યો છે.
યુક્રેન પર રશિયાના હુમલાને 100 કલાક વીતી ગયા છે. હુમલાનો આજે પાંચમો દિવસ છે. દેશભરમાં સર્જાયેલા આ સંકટ વચ્ચે યુક્રેનમાં વીજળીની અછત સર્જાઈ છે. તેના કારણે હોસ્પિટલો એટલે કે આરોગ્ય સેવાઓ પર પણ ગંભીર સંકટ છે. એ જ રીતે દર્દીઓને એમ્બ્યુલન્સ દ્વારા એક જગ્યાએથી બીજી જગ્યાએ ખસેડતી વખતે તેમના પર ગોળીબાર થવાનું જોખમ પણ વધી ગયું છે.
