યુક્રેનમાં ફસાયેલા 256 વિદ્યાર્થીઓને લઇ આજે રાત્રે વિમાન દિલ્હી પરત ફરશે,કિવથી દિલ્હી માટે વધુ ત્રણ ફ્લાઈટ ચાલશે
યુક્રેન પર હુમલાના વધતા ડર વચ્ચે ભારતે યુક્રેન અને આસપાસના વિસ્તારોમાં રહેતા ભારતીય નાગરિકોને ખાલી કરાવવાની કામગીરી શરૂ કરી છે. એર ઈન્ડિયાનું એક વિશેષ વિમાન આજે સવારે યુક્રેન માટે રવાના કરવામાં આવ્યું છે. ભારતે આ વિશેષ મિશન માટે 200થી વધુ સીટર ડ્રીમલાઈનર B-787 એરક્રાફ્ટ તૈનાત કર્યા છે. આ ફ્લાઇટ યુક્રેનના ખાર્કિવથી 256 ભારતીય વિદ્યાર્થીઓ સાથે દેશ પરત ફરશે. મળતી માહિતી મુજબ, ફ્લાઈટ આજે રાત્રે 10.15 કલાકે દેશ પરત ફરશે.
દરમિયાન, યુક્રેનમાં ઉચ્ચ સ્તરીય તણાવને ધ્યાનમાં રાખીને, ભારતે વધારાની ફ્લાઇટ્સ ચલાવવાનો નિર્ણય કર્યો છે. યુક્રેનમાં ભારતીય દૂતાવાસના જણાવ્યા અનુસાર, કિવથી દિલ્હીની વધારાની ફ્લાઇટ્સ 25 ફેબ્રુઆરી, 27 ફેબ્રુઆરી (બે ફ્લાઇટ્સ) અને 6 માર્ચ, 2022ના રોજ ઓપરેટ થશે.
વિદ્યાર્થીઓને તાત્કાલિક યુક્રેન છોડવાની અપીલ
યુક્રેન સંકટ વચ્ચે ભારતે ફરી એક વખત અપીલ કરી છે કે ભારતીય નાગરિકો અને વિદ્યાર્થીઓ તાત્કાલિક યુક્રેન છોડી દે. યુક્રેનની રાજધાની કિવમાં ભારતીય દૂતાવાસ દ્વારા ફરી એકવાર એડવાઈઝરી જારી કરવામાં આવી છે. જેમાં ભારતીય વિદ્યાર્થીઓને તાત્કાલિક યુક્રેન છોડવાની અપીલ કરવામાં આવી છે. એવું કહેવામાં આવ્યું છે કે ભારતીય વિદ્યાર્થીઓએ યુનિવર્સિટીઓ દ્વારા ઓનલાઈન ક્લાસની સત્તાવાર પુષ્ટિને બદલે તેમના વતન પાછા ફરવું જોઈએ. દૂતાવાસે કહ્યું કે તેને મોટી સંખ્યામાં કોલ મળી રહ્યા છે, જેમાં વિદ્યાર્થીઓ મેડિકલ યુનિવર્સિટીઓ દ્વારા ઓનલાઈન ક્લાસની પુષ્ટિ વિશે પૂછી રહ્યા છે. દૂતાવાસે કહ્યું છે કે વિદ્યાર્થીઓ અને નાગરિકોએ તેમની સુરક્ષાને ધ્યાનમાં રાખીને અસ્થાયી રૂપે પાછા ફરવું જોઈએ. ભારતીય દૂતાવાસ શિક્ષણ પ્રક્રિયાને સુવ્યવસ્થિત કરવા માટે સંબંધિત અધિકારીઓ સાથે સતત સંપર્કમાં છે.
ભારતીય નાગરિકો અમારી પ્રાથમિકતા છે
રશિયા દ્વારા યુક્રેનના બે શહેરોને સ્વતંત્ર જાહેર કરવા અને સૈનિકો મોકલવાના આદેશો વચ્ચે સંયુક્ત રાષ્ટ્ર સુરક્ષા પરિષદે કટોકટી બેઠક બોલાવી છે. આમાં, સંયુક્ત રાષ્ટ્રમાં ભારતના સ્થાયી પ્રતિનિધિ ટીએસ તિરુમૂર્તિએ કહ્યું કે રશિયન ફેડરેશન સાથે યુક્રેનની સરહદ પર વધી રહેલો તણાવ ઊંડી ચિંતાનો વિષય છે. આ ઘટનાક્રમથી પ્રદેશની શાંતિ અને સુરક્ષામાં ખલેલ પહોંચશે. તેમણે કહ્યું કે 20,000 થી વધુ ભારતીય વિદ્યાર્થીઓ અને નાગરિકો યુક્રેનના વિવિધ ભાગોમાં રહે છે. ભારતીયોની સુરક્ષા અમારી પ્રાથમિકતા છે. તેમણે કહ્યું કે ભારત બંને પક્ષો પર સંયમ રાખવા અને રાજદ્વારી પ્રયાસોને વધુ તીવ્ર બનાવવાનો આગ્રહ રાખે છે.
પુતિને સૈન્ય મોકલવાનો આદેશ આપ્યો
રશિયાના રાષ્ટ્રપતિ વ્લાદિમીર પુતિને પૂર્વી યુક્રેનથી અલગ થયેલા બે શહેરો ડોનેત્સ્ક અને લુહાન્સ્કને સ્વતંત્ર તરીકે માન્યતા આપી છે. તેમણે સોમવારે રાષ્ટ્રને સંબોધનમાં આ જાહેરાત કરી હતી. રશિયાના રાષ્ટ્રપતિ વ્લાદિમીર પુતિને પોતાના સંબોધનમાં યુક્રેનને અમેરિકાની વસાહત ગણાવતા કહ્યું કે યુક્રેનનું શાસન અમેરિકાના હાથની ‘કઠપૂતળી’ છે. મોસ્કો સમર્થિત બળવાખોરો અને યુક્રેનિયન દળો વચ્ચેના સંઘર્ષમાં રશિયાને સૈન્ય દળો અને શસ્ત્રો મોકલવાનો માર્ગ મોકળો કરીને પુતિને રાષ્ટ્રપતિની સુરક્ષા પરિષદની બેઠક બાદ આ જાહેરાત કરી હતી.
