કાશ્મીરી પંડિતોની હિજરતનો મુદ્દો હેડલાઇન્સમાં છવાયેલો છે ત્યારે આતંકવાદીઓએ એક ભયાનક ઘટનાને અંજામ આપ્યો છે. કાશ્મીરના શોપિયાં જિલ્લામાં કાશ્મીરી પંડિત પર હુમલાની ઘટના સામે આવી છે. ઘટના બાદ સુરક્ષાદળોએ સમગ્ર વિસ્તારને ઘેરી લીધો છે અને સર્ચ ઓપરેશન હાથ ધર્યું છે.

પીડિતાની ઓળખ કાશ્મીરી પંડિત સોનુ કુમાર બલજી તરીકે થઈ છે. કહેવામાં આવી રહ્યું છે કે દક્ષિણ કાશ્મીરના શોપિયાં જિલ્લાના ચિત્રગામના રહેવાસી સોનુ કુમારે હિજરત દરમિયાન કાશ્મીર છોડ્યું ન હતું. સોમવારે સાંજે આતંકીઓએ તેના પર ગોળીબાર કર્યો હતો. હુમલામાં બલજીને ત્રણ ગોળી લાગી હતી. તેમને ગંભીર હાલતમાં શ્રીનગરની હોસ્પિટલમાં દાખલ કરવામાં આવ્યા છે. સોનુની શોપિયામાં મેડિકલ સ્ટોર છે. તેઓ છેલ્લા 30 વર્ષથી કાશ્મીરમાં રહે છે. આ હુમલા સિવાય ખીણમાં છેલ્લા 24 કલાક દરમિયાન આતંકવાદીઓ દ્વારા 7 લોકો પર હુમલો કરવામાં આવ્યો છે.