મધ્યપ્રદેશની પ્રથમ મહિલા ક્રિકેટ એકેડમી શિવપુરી જિલ્લામાં સ્થાપવામાં આવશે અને ખેલાડીઓની પસંદગી માટે ટેલેન્ટ હન્ટ પ્રોગ્રામ સોમવારથી શરૂ થશે. શિવપુરી રાજ્યના રમતગમત અને યુવા કલ્યાણ મંત્રી યશોધરા રાજે સિંધિયાનો વિધાનસભા મત વિસ્તાર છે. રાજ્યના એક અધિકારીએ કહ્યું, “રાજ્યની આ 11મી સ્પોર્ટ્સ એકેડમી હશે.

મધ્યપ્રદેશમાં એથ્લેટિક્સ, શૂટિંગ, ઘોડેસવારી, વોટર સ્પોર્ટ્સ, માર્શલ આર્ટ, મેન્સ હોકી, મહિલા હોકી, બેડમિન્ટન, તીરંદાજી અને પુરૂષોની ક્રિકેટ એકેડમી પહેલેથી જ ચાલી રહી છે. તેમણે કહ્યું કે રાજ્યની મહિલા ક્રિકેટ એકેડમી માટે પ્રતિભા શોધ કાર્યક્રમ 28 ફેબ્રુઆરીથી શરૂ થશે. તે 14 થી 21 વર્ષની વય જૂથ માટે ખુલ્લું રહેશે.
રાજ્ય સરકારના નિવેદન અનુસાર, એકેડેમી માટે પ્રથમ ટેલેન્ટ સર્ચ ડ્રાઇવ 28 ફેબ્રુઆરી અને 1 માર્ચે ઈન્દોરમાં યોજાશે. જેમાં ઈન્દોર અને ઉજ્જૈન વિભાગના તમામ જિલ્લાના ખેલાડીઓ ભાગ લઈ શકશે. તેવી જ રીતે, રાજ્યની રાજધાની ભોપાલમાં, ભોપાલ, નર્મદાપુરમ અને સાગર વિભાગના જિલ્લાઓ માટે 2 અને 3 માર્ચે પ્રતિભા શોધ અભિયાન હાથ ધરવામાં આવશે.

જબલપુર વિભાગના જિલ્લાઓ માટે, 4 અને 5 માર્ચે, જ્યારે ગ્વાલિયર અને ચંબલ વિભાગના જિલ્લાઓ માટે, 7 અને 8 માર્ચે શિવપુરીમાં અભિયાન હાથ ધરવામાં આવશે. નિવેદનમાં કહેવામાં આવ્યું છે કે એમપીમાં રમતગમત વિભાગ દ્વારા તમામ એકેડેમીમાં પસંદગી પામેલા ખેલાડીઓને શિક્ષણ, રહેઠાણ, ભોજન, તાલીમ મફત આપવામાં આવે છે.