અરુણાચલ પ્રદેશના સાંસદ તાપીર ગાઓએ બુધવારે કહ્યું કે, ચીનની પીપલ્સ લિબરેશન આર્મી (PLA) એ રાજ્યના ભારતીય વિસ્તારના અપર સિયાંગ જિલ્લામાંથી 17 વર્ષીય કિશોરનું અપહરણ કર્યું છે. ગાઓએ જણાવ્યું હતું કે અપહરણ કરાયેલ કિશોરની ઓળખ મીરામ તારોન તરીકે થઈ છે. તેમણે કહ્યું કે ચીની સેનાએ સેઉંગલા વિસ્તારના લુંગટા જોર વિસ્તારમાંથી કિશોરનું અપહરણ કર્યું હતું.

સાંસદે લોઅર સુબાનસિરી જિલ્લાના જિલ્લા મથક ઝીરોથી ફોન પર પીટીઆઈને જણાવ્યું હતું કે પીએલએમાંથી નાસી છૂટવામાં સફળ રહેલા તારોનના મિત્ર જોની યિંગે સ્થાનિક અધિકારીઓને અપહરણ અંગે જાણ કરી હતી. તેણે જણાવ્યું કે બંને કિશોરો જીડો ગામના રહેવાસી છે.

સાંસદે કહ્યું કે આ ઘટના તે સ્થળની નજીક બની છે જ્યાંથી શિયાંગ નદી અરુણાચલ પ્રદેશમાં ભારતમાં પ્રવેશે છે.

આ પહેલા મંગળવારે ગાઓએ ટ્વીટ કરીને કિશોરીના અપહરણની માહિતી શેર કરી હતી. તેણે ટ્વીટની સાથે અપહરણ કરાયેલા કિશોરની તસવીર શેર કરી અને કહ્યું, “ભારત સરકારની તમામ એજન્સીઓને વિનંતી કરવામાં આવે છે કે તે કિશોરની વહેલી મુક્તિ સુનિશ્ચિત કરે.”