ઓસ્ટ્રેલિયાના પૂર્વ ક્રિકેટર શેનવોર્નનું 52 વર્ષની વયે હાર્ટ એટેકના કારણે થાઈલેન્ડમાં નિધન
ઓસ્ટ્રેલિયાના પૂર્વ ક્રિકેટર શેનવોર્નનું 52 વર્ષની વયે હાર્ટ એટેકના કારણે થાઈલેન્ડમાં નિધન થયું છે. શેન વોર્ન ઓસ્ટ્રેલિયા માટે 300 થી વધુ આંતરરાષ્ટ્રીય મેચ રમી ચૂક્યા છે અને તેને વિશ્વનો મહાન લેગ સ્પિનર કહેવામાં આવે છે. તેની બોલિંગ સામે અનુભવી બેટ્સમેન પણ પાણી ભરતા હતા. જોકે, એ અલગ વાત છે કે સચિન તેંડુલકરની સામે તે બહુ પ્રભાવશાળી નહોતો.
ટેસ્ટ ક્રિકેટમાં તેની 708 વિકેટ છે. આ સાથે જ તેણે વન-ડે ઈન્ટરનેશનલ ક્રિકેટમાં 293 વિકેટ ઝડપી છે. આ સિવાય તે આઈપીએલ સિઝન વનનું ટાઈટલ જીતનાર કેપ્ટન રહી ચૂક્યો છે. તેણે રાજસ્થાન રોયલ્સને પ્રથમ IPL ટ્રોફી આપી હતી.
ઈન્ડિયન પ્રીમિયર લીગ (આઈપીએલ) ટાઈટલ જીતનાર પ્રથમ કેપ્ટન બનવાનો રેકોર્ડ પણ શેન વોર્નના નામે છે. IPL-2008માં મોટે ભાગે અજાણ્યા ચહેરાઓથી ઘેરાયેલી રાજસ્થાન રોયલ્સ ટીમને ટાઈટલ જીતવા માટે લાયક ગણવામાં આવી ન હતી. આવી સ્થિતિમાં ટીમના ચેમ્પિયન બનવા માટે વોર્નની રણનીતિ જવાબદાર માનવામાં આવે છે.
શેન વોર્નની ગણતરી વર્ષ 2000માં 20મી સદીના 5 મહાન ક્રિકેટરોમાં કરવામાં આવી હતી, પરંતુ તે વિવાદો સાથે પણ ખૂબ જ ગાઢ સંબંધ ધરાવે છે. નિષ્ણાતો એમ પણ કહે છે કે તે એવો ક્રિકેટર હતો જેને ઓસ્ટ્રેલિયન ટીમનો કેપ્ટન બનવો જોઈતો હતો, પરંતુ તેણે હંમેશા આ સંભાવના પર પોતાની જાતને લાત મારી. પછી તે બુકીઓને પિચ અને હવામાનની માહિતી આપવી હોય કે પછી 2003 વર્લ્ડ કપ માટે દક્ષિણ આફ્રિકા પહોંચ્યા પછી ડ્રગના ઉપયોગ માટે પ્રતિબંધિત કરવામાં આવ્યાં હતાં. તેના અફેર અને મેદાનની બહાર છૂટાછેડા, ભાગ્યે જ કોઈ એવી જગ્યા હશે જ્યાં વોર્નનું નામ વિવાદો સાથે જોડાયેલું ન હોય.
