મહારાષ્ટ્રના પૂર્વ સીએમ દેવેન્દ્ર ફડણવીસની અટકાયત કરવામાં આવી છે. તેઓ NCP નેતા નવાબ મલિક વિરુદ્ધ મોરચો કાઢી રહ્યા હતા. પોલીસે તેમને મેટ્રો જંકશનની સામે જવા દીધા ન હતા, તેથી દેવેન્દ્ર ફડણવીસ અને અન્ય નેતાઓની પોલીસે અટકાયત કરી હતી અને તેમને પોલીસ વાનમાં લઈ ગયા હતા. ભાજપના નેતાઓને કસ્ટડીમાં લીધા બાદ કાર્યકરોએ સૂત્રોચ્ચાર કર્યા હતા.
તમને જણાવી દઈએ કે દેવેન્દ્ર ફડણવીસ અને બીજેપીના અન્ય નેતાઓ એનસીપી નેતા નવાબ મલિકના રાજીનામાની માંગ સાથે આઝાદ મેદાનમાં વિરોધ પ્રદર્શન કરી રહ્યા હતા. જેના કારણે તેને કસ્ટડીમાં લેવામાં આવ્યા હતા. તેમને કસ્ટડીમાં લીધા બાદ મેટ્રો જંકશન પરથી બેરિકેડ હટાવીને રસ્તો ખુલ્લો કરવામાં આવ્યો હતો.
ઉલ્લેખનીય છે કે, નવાબ મલિકની ED દ્વારા મની લોન્ડરિંગ કેસમાં ધરપકડ કરવામાં આવી હતી. મુંબઈ અંડરવર્લ્ડ, ભાગેડુ ગેંગસ્ટર દાઉદ ઈબ્રાહિમ અને તેના સાથીઓની ગતિવિધિઓ સંબંધિત મની લોન્ડરિંગ કેસમાં પૂછપરછ બાદ ED દ્વારા મલિકની ધરપકડ કરવામાં આવી હતી.નવાબ મલિકની જમીન સોદા અંગે પૂછપરછ કરવામાં આવી હતી. EDનું કહેવું છે કે પૂછપરછ દરમિયાન નવાબ મલિક જવાબ આપવાનું ટાળી રહ્યા હતા અને તેણે તપાસમાં સહકાર આપ્યો ન હતો. તાજેતરમાં એન્ફોર્સમેન્ટ ડિરેક્ટોરેટે ઘણી જગ્યાએ દરોડા પાડ્યા હતા અને આ કેસમાં દાઉદ ઈબ્રાહિમના ભાઈ ઈકબાલ કાસકરને પણ કસ્ટડીમાં લેવામાં આવ્યા હતા.