રવિવારની સરખામણીએ દેશમાં કોરોનાના દૈનિક કેસોમાં થોડો ઘટાડો થયો છે. છેલ્લા 24 કલાકમાં દેશમાં કોરોનાના 3,06,064 કેસ નોંધાયા છે. જોકે રવિવારે કોરોનાના 3.33 લાખ કેસ નોંધાયા હતા. દેશમાં કોરોનાના રોજિંદા કેસોમાં થોડો ઘટાડો થયો છે, પરંતુ સક્રિય કેસની સંખ્યામાં ઘટાડો થવાનું નામ નથી લઈ રહ્યો.
છેલ્લા 24 કલાકમાં સક્રિય કેસની સંખ્યા વધીને 22,49,335 થઈ ગઈ છે. આ સાથે, સક્રિય કેસોની સંખ્યા કુલ કેસના 5.69 ટકા પર પહોંચી ગઈ છે. છેલ્લા દિવસોમાં કોરોનાના કેસમાં વધારો થતાં મૃત્યુનો દૈનિક આંકડો પણ વધી રહ્યો છે. છેલ્લા 24 કલાકમાં દેશમાં 439 મોત નોંધાયા છે.
કોરોનાથી સંક્રમિત લોકોની સંખ્યાની તુલનામાં, સાજા થનારા લોકોની સંખ્યા પણ બે લાખથી વધુ છે. છેલ્લા 24 કલાકમાં 2,43,495 લોકો કોરોના સંક્રમણને હરાવવામાં સફળ રહ્યા છે. આ પછી, સાજા થનારા લોકોની કુલ સંખ્યા 3,68,04,145 થઈ ગઈ છે.
દેશમાં કોરોના સંક્રમણનો દર વધી રહ્યો છે. દેશમાં દૈનિક પોઝીટિવિટી દર વધીને 20.75 ટકા થયો છે. તે જ સમયે, સાપ્તાહિક પોઝીટિવિટી દરમાં પણ વધારો થયો છે. સાપ્તાહિક પોઝીટિવિટી દર વધીને 17.03 ટકા થયો છે.
છેલ્લા 24 કલાક દરમિયાન દેશમાં 14,74,753 લોકોએ ટેસ્ટ કરાવ્યો છે, ત્યારબાદ દેશમાં ટેસ્ટ કરાવનારા લોકોની સંખ્યા 71.69 કરોડ થઈ ગઈ છે. તેમજ દેશવ્યાપી રસીકરણ અભિયાન અંતર્ગત અત્યાર સુધીમાં રસીના 162.26 કરોડ ડોઝ આપવામાં આવ્યા છે.
